Waxaa ka dhacay Magaalada Nairobi ee xarunta dalka Kenya Munasibad balaaran oo lagu taageerayay Maamulka Jubbaland garabka Axmed Madoobe, waxaana kasoo qayb galay Madax uu kamid yahay Madaxwaynaha Maamul goboleedka Puntland C/rixmaan Sheekh maxamed Faroole.
C/sataar Xasan Cali oo kamid ah Safaarada Somalida ee dalkaasi Kenya ayaa u sheegay Saadaal Media halkaasi inay ka hadashay Madax badan, isagoona geesta kale xusay Faroole inuu munaasibada ka sheegay Madaxwaynaha Soomaaliya Xasan Sheekh maxamuud dhawaan marka uu soo gaaro Nairobi inuu kala hadli doono arinta Jubbaland iyo sidii lagu taageri lahaa Maamulka Axmed Madoobe.
Madaxweynaha dowlad goboleedka Punt-land C/raxmaan Maxamed Maxamuud Faroole, ayaa sheegay in uu madaxweynaha dowladda federaalka ah ee Soomaaliya Xasan Sheekh Maxamuud uu kulan looga hadlayo arrimaha dastuurka iyo xal u helista arrimaha Jubbooyinka maalinta Arbacada kula qaadan doono magaalada Nairobi ee xarunta dalka Kenya.
Faroole, oo galabta la hadlay jaaliyada Soomaaliyeed ee ku dhaqan Kenya, ayaa sheegay in uu madaxweynaha ku boorin doono in aan la gacmagacmeyn dastuurka ummadda Soomaaliyeed u dagsan ee lagu soo doortay dowladda haatan dhisan.
Madaxweyne Faroole, waxa uu ugu baaqay dowladda federaalka ah ee Soomaaliya in ay aqoonsato maamulka Jubba-land ee uu madaxweynaha u yahay Axmed Madoobe, oo uu Faroole sheegay in ay soo doorteen dadka gobolada Jubbooyinka.
Cabdiraxmaan Maxamed Maxamuud Faroole, ayaa dhinaca kale si weyn ugu ammaanay jaaliyadda Punt-land ee ku nool Kenya kaalinta ay ka qaateen horumarka weyn ee ka socda deegaanada Punt-land, wuxuuna ka codsaday in aysan ka daalin wax u qabashada dadkooda.
Faroole ayaa kamid ah Siyaasiyiinta sida wayn u taageersan Maamulka Axmed Madoobe waxaana uu marar badan oo uu hadlay sheegay maamulka Jubbaland ee Hogaamiyo Axmed Madoobe inuu yahay mid ku dhisan habsharciga waafaqsan, isagoona geesta kale ku dhaliilay Madaxda dowladda Federaalka inay isbadal ku sameeyeen Dastuurkii Soomaaliya.
RIIX HALKAAN KA DHAGEYSO AMA KU DHAGAYSO MOBILE
