Dowlada dalka Kenya ayaa ka dalbatay wadamada Asia in ay gacan ka gaystaan sidii qaxootiga Soomaalida ah ee ku sugan Kenya dib logu celin lahaa dalkooda hooyo ee Soomaaliya.
Wasiirka arimaha dibada dalka Kenya Amina Maxamed oo isniinti Nairobi kulan kula yeelatay danjirayaasha wadamada Asia u fadhiya Nairobi ayaa waxa ay ka dalbatay in gacan dhaqaale ay ka gaystaan sidii qaxootiga Soomaalida ah ee nus malyuunka dhan dib loogu celin lahaa dalka Soomaaliya.
Amina ayaa waxa ay farta ku fiiqday in dowladaha Kenya iyo Soomaaliya ay wadaan geedi socodkii iyo istaraatijiyadii loo mari lahaa dib u celinta qaxootiga Soomaalida ee ku jira xarooyiinka Dhadhaab.
Wasiirka arimaha dibada ee Kenya ayaa dhanka kale shaaca ka qaaday in kulan caalami ah bisha Agust ee soo socota lagu qaban doono Nairobi kaasi oo looga hadli doono sidii beesha caalamka ay uga qayb qaadan lahaayeen dib u celinta qaxootiga Soomaalida ah ee Kenya ku sugan.
Qorshaha dib u celinta qaxootiga Soomaalida ah ee ku sugan xirooyiinka dalka Kenya ayaa waxa si wada jir ah diyaarintiisa u wada dowladaha Kenya, Soomaaliya iyo hay’ada qaxootiga aduunka ee UNHCR.